الخميس، 2 يناير، 2014

قالوا عنى

اكيد كلنا عارفين لعبه الارقام اللى بدات زى النار ف الهشيم ف الفيسبوك مع بدايه سنه 2014 وبالرغم ان كان ناس كتير مش عجبها  اللعبه بحجه انه نفاق وهرى وبتاع وانه مش عايزين التايم لاين بتاعهم يبقى مليا شويه كلام للعبه وانهم شايفين ان اللى بيلعبوا دول تافهيين و شويه حاجات كده الا الناس اللى بيلعبوها اصروا انهم يكملوا لعب واستمرت يمكن لاكتر من 3 ايام  متواصله وبقوة كمان لدرجه انه اتكتب عنها  فالجرايد وكده . المهم يعنى انا كنت قلت انى هاجمع كل اللى اتكتب عنى عشان افضل فاكرة لو فيه عيوب اصلحها و افتكر الناس اللى قالوا كلمه حلوة ف حقى يمكن احتاج الكلمات ديه ف يوم من الايام واهى التجمعيه اللى انا عرفت اجمعها طبعا مش كلها لكن دول اللى قدرت اجيبهم 


جمال و طيبة النوبه هي
دماغها عاليه جداً و ف اعتقادي ان مهما اصحابها فهموها ،، ف هما لسه ماعرفوش عن شخصيتها كل حاجه ،،
انا ممكن اشبها بالنيل ،، عندها عطاء للي حواليها حتي لو العطاء ده معنوي ،، و عمرها ما بتخلص و اسمها علي مسمي
I love U #smile



هي ناشطه نوبيه قبل ماتكون مهندسه ,,
عندها اعتزاز بتراثها الحضاري بطريقه فوق الوصف
عندها عقليه معمليه فذه ,, ودحيحه برضو ,,
ليها منظورها الخاص لكل حاجه
تختلف معاها او تتفق معها في الرأي لكنها لا تملك سوي الاحترام طريق للنقاش
عدت عليها أوقات صعبه بس قدرت أنها تثبت أنها صخره الأمواج تخاف منها
بتدعم شباب كليتنا وشباب IEEE بشكل لا يصدق
ربنا يكرمها وبالتوفيق دايما !!


دكتورتنا الجميلة
نسيتك من بعد ثانوى و اتقابلنا متأخر مكنتش فاكر انك شاطرة جدا كدة
ياريت متزعليش من الطلبة اللى عندك ف الكلية اللي اتخانقتى معاهم من بلكونة البيت عندك .. مكنش قصدهم يضيقوكى :))

طلبت منها رقم عشان أقولها اللي في نفسي
لما باتحط في موقف جديد أو مش عارفة أتصرف فيه أو تعجزني فيه وغودية من أمامي بافكر: لو كانت هي مكاني ممكن تعمل ايه؟ عقل راجح أوي ..
 زيادة عن اللزوم باحقدها بصراحة على قوتها وثباتها على الحاجات اللي هي مؤمنة بيها مهما قربت منها دايماً حاسة إن لسه فيه أكتر
.. نفسي أقرب تاني .. ناجحة وشجاعة ومنطلقة كده تحسسك بالشمس والهوا


عارفه : صعب الكلام فى السر المعلن فى اللعبه دى وبذات معاكى .
. خايفه انسى حاجة حلوة عندك عشان انتى حساسة بزيادة .. صادقة عن اقتناع .. جدعه ومن قبل ما اتجدعن معاكى ...
. بنت حقيقية فى زمن قل فيه البنات اللى كده .. شوية كمان وهكتب أسمك بالغلط



معجبه بيكى بروحك المرحه وخفة دمك
و بحس فيكى حد عنده اصرار و مثابره احب جدا علاقتنا تتطور خصوصا وانى معنديش صحاب كتير


شخص عايش في عالم تاني لما تقرب منه تحس انه بعيد عن الدنيا ب 10 سنين اهم عيوبه اللافعل يفضل سنين مش عارف عاوز ايه شغل دراسة حياة خاصة و بالذات الخاصة دي


بنوتة اكدت لي ان بنات النوبة فيهم جواهر محتاجين نكتشفها بس ..
.. فيها عزة و هدوء و وقار مش عارفة جابتهم منين في سنها الصغير دة ...باحب فيها انها مكملة في حلمها رغم العراقيل ..يارب يبلغني يوم مناقشة الدكتوراة بتاعتها ....ونسي في ليالي سودة .
... ارواحنا و عقولنا ائتلفوا و بسرعة ....مفقوسة اوي صح ؟؟!!

شخصية اصيلة وجدعة لها ارائها المميزة الي بتعجبني اغلبها تحس ان الشخصية دي
كوليكشن غريب كدة له استايل مختلف رغم ان احنا نعرف بعض من زمااااااان بس اتضح ف الفترة الاخيرة ان احنا مكناش نعرف بعض كويس او انا ع الاقل ولسه برضو بكتشف


حد اول ماتشوفه من شكله تشوف فيه طيبة زمان وتحس بارتياح غير طبيعى ولما تقرب منه بتحس بكمية حب غير طبيعية تبقى نفسك ماتسبهوش خاااااااااالص وبتضايق من طوله فى الصور معايا



الـدمـــــــــاغ #العليا
بتعجبنى أرائك جدا..
شخصية #قوية..
من الناس اللى شوفتها واستجدعتها جدااااااااا


انتي رمز
ساعات كتير مش ببقي فاهمك
ساعات بحسك طيبه وساعات بحسك شريره
بس انتي بنت جدعه جدا وطموحه جدا واتمني تقدري تكملي في مشوارك وتنفذي كل طموحاتك واحلامك
ساعات مش بحب فيكي عنصريتك
بس ستظلي رمز


عرفتك مدة صغيرة .. بس حسيت انى عرفت اميرة
نفسى نقرب اوى ونبقى اصحاب قريبين مش مجرد اتنين بيتقابلوا ع مزاج الظروف


شخصية طيبة وجدعة
تبصلها تلاقى البراءة فى عيونها
تسمعها تلاقى الحكمة فى كلامها
اخت كبيرة ليا
وكويس لاقيت حد غيرى بيؤمن بال inner peace


انك تقابل انسان تحس ان تعرفو من زمان تقف قصاد ذوقه وعقله اجلال واحترام وتقدير ..دي بتحصلي قليل اوي ..لما قابلتك كانت احدي هذه المرات القليلة

شخصية مكانها الحقيقي مش مصر
دماغها كبيرة وطيبة وهادية
يارب تحققي كل احلامك واشوفك حاجة كبيرة


من اكتر الناس اللى باعتز بصحوبيتها .. تفكيرها عالى ذكية وطموحة جدا جدا جدا وكلمة جدعة قليلة عليها قوى
 .. كلمة فى سرك (بأغير منك ساعات - بس غيرة حلوة يعنى نفسي ابقى زيك فى حاجات كتير منها ثقتك العالية فى نفسك واللى فى محلها اكيد -


معرفهاش أوي يعني , بس من الواضح إنها شخصية تتصاحب ويعتمد عليها وجدعة كده , وأكيد هنتقابل قريب ان شاء الله :))


بنت جددددددددددعه وصاحبه صاحبتها مالهاش فى الف والدوران ون واى زى مابيقولوا
انتى عجباااااااانى بكل مافيكى ولكن اتمنى انك تبقى شويه كيوت وتحاولى توصلى اللى عايزاه بطريقه تريحك وتريح كمان اللى قدامك .على الرغم ان انتى كده عجبانى ولكن بقى نعمل ايه شر لابد منه


بحب الشخصيه جدا ,احيانا من فرط اللباقه مش بفهمها بحب فيها انها متصالحه جدا مع
نفسها قويه جدا ,عايشه الحياه والحريه ,يمكن احنا مش بنتكلم كتير بس اهو قليل يكفي ,بعمل حسابي وانا بتكلم معها بخاف من رد فعل الشخصيه دي شويه !

شخصيه مجتهده .... مقضيتش معاها اوقات كتير بس احترمتها جدا .... اراءها في اي حاجه من دماغها

: أعرفها عن طريق اخواتها صحابي، للاسف مش بشوفها:-( ،
علاقتي فيسبوكية بيها أكتر ،من الناس اللي بحب أقرا بوستاتها،
 بحسها صادقة مع نفسها ، حد نضيف من جواه،الماجستير عمالها هسهس هتنجحي وتوصلي لأهدافك احنا افريقيات يعني ياجبل ما يهزك ريح ، بحس كمان عايشة حالة توزان نفسي
، جذورنا هي البتمدنا بطاقات نواجه بيها اي مصاعب
،لو سمحتي فضينا وقت عشان انا عايزة أحكي معاكي كتير ،حكاوي ياما واكتشف قواسمنا المشتركة ،بلطجة مني كدة هنكون صحاب



2alb abyaad w tayeb geddan geddaan ... sha5seyya qaweyya w dema3' bs bete3gebny dema3'ha w tafkeerha.. saree7a geddan w elly fi albaha 3ala lesanha dayman ... ana bamoot fiha w heyya bardo 3arfa
w kan nefsy ashofha awyyy abl ma asafer

انا لو احكي عليه انا هوصف ايه وده كل ما فيه ولا في الاحلام
اه ياسلام ياسلام ياسلام ياسلام
اول ماشوفتها عمري ماتوقعت ان احنا هنبقى اصحاب لان مفيش اي شبه بنا ظاهريا .. بس بحكم الشغل قربنا لبعض اكتر ومع الوقت اكتشفت ان فيها حاجات كتييييييييييييير زيي غير انها مقاتلة باسلة في الحوارات مادام مقتنعة بمبداها وشايفة انها على حق واحلى حاجة بتعجبني فيها انها لما بتغلط بتعترف بغلطها وبتقول نقط ضعفهها بكل شجاعه وده اللي بيخليها تكبر في نظري اكتر
اثرت عليا في حاجات كتير بحب الكلام معاها جدا في اي حاجة وفي كل حاجة القعدة معاها بتنقلني لعالم تاني خالص وحشااااااااااني اوي .


اول ما تشوفها كدة تحس بتفاؤل بجد بتحس ان الدنيا بخير وفيها ناس طيبة .
.. متعاملناش كتير بردو بس انا مصر اصرار شديد اننا نشتغل في المشروع اللي عرضته عليها واللي اكيد هي نسيته


عرفتها من فترة صغيرة .... حد كدا من اول تعامل تحس انها اختك .....عندها هدف جميل... اصرارها ...هايخليها تحققه وتعمل حاجة كبيرة قريب جدا ... ربنا معاكى.... لو محتاجة مساعدة اوعى تطلبيها منى


معرفتي بيكي جات من الكلية شوفتك هناك كتير و اقولك سر كدو صغنون كنت منبهرة بيكي مع انى معرفكيش ولا اعرفك ف سنة كام ولا بتشتغلي ف الكلية ولا اي حاجة بس كنت بحس كدة انك حد مهم اوى _الهيبة حلوة مفيش كلام_ بس بعد اما عرفتك شوية انبهاري زاد اصلا عجباني دماغك جدا و طريقة تفكيرك غير تقليدية بالمرة و حد مش صعب تتكلم معاه .........................استمرى متخليش حاجة توقفك خلي بالك انك مثل اعلى ل ناس كتير عايزة تبقى زيك
اه صح انا اساسا كنت بشوفك كتير بس تقريبا اول مرة اتكلم معاكي كنا ف المسجد زصليتي معايا جماعة بقى وانا كنت فرحانة بقى

شخصية جميلة اللي تقدر تقول عليهم " مصري أصلي " من بلاد الذهب حيث النفوس الصافية والقلوب الطيبة ليها وجهة نظر صادمة في بعض الاحيان لكنها صادقة
لما ادخل معاها في مناقشة هيكون بالورقة والقلم لإنها شخصية مينفعش تخسرها

مهندسة شاطرة ... ما اتعاملناش مع بعض كتير بس لما اتعاملنا اقدر اقوللك ان دمك خفيف ... و مش فضولية و مش تقيلة بالعكس ... يعنى كنتى عاملة توازن غريب جدا بين انك تكونى معروفة و محبوبة بين الناس و فى نفس الوقت مش تقيلة خالص !
ده غير ان بلدك ليها معزة خاصة عندى بعد الاسماعيلية طبعا
اعتقد من عيوبها انها لازم متكسلش وتحاول تنجز الحجات اللي عليها -العيب ده جبته من كلامها عن نفسها - ربنا يكرمها ان شاء الله

ليست هناك تعليقات:

إرسال تعليق