السبت، 22 ديسمبر، 2012

من يوميات واحده عصرت الليمون

ف البلوج اللى فاتت حاولت اتكلم عن اسباب عصر الليمون فيه سبب كمان بالاضافه لاسباب اللى فاتت وهى ، انى كنت عايزة ادى الاخوان الفرصه كامله بماانهم ايام البرلمان فعدوا يندبوا ان المجلس العسكرى معكاس معهم وكده وبغض النظر انى ف رايى ده كلام فستك ولمجرد الشو الا انى قولت انتخبهم عشان ياخدوا الفرضه كامله مكلمه 
المهم بقى يوم الانتخابات رحت وانا بقدم رجل وباخر التانيه ووصلت اللجنه تقريبا متاخر اووى بالرغم انه كان اجازة ووقفت ف الطابور واخدت الورقه وانا ببص عليه حاسيت احساس فظيع عرفت ساعتها معنى الليمون حسيت انى عايزة ارجع كل اللى ف بطنى ع الورقه بس استحملت حبتين واديت مرسى الصوت وانا ف قمه الضرر وروحت البيت ف انتظار النتيجه ولما طلعت النتيجه فرحت مع كل اللى فرح  مش عشان سواد عيون الاخوان الا انه مجش شفيق .وقولت ع خلاص يا بت هتروح وتحلى بقى عندنا رئيس منتخب  اول مرة من 7الالف سنه -ويارب متكنش اخره مرة -وسنبدا سويا بقى ف النهضه 

2012 سنه الفرز

الاسم : سنه 2012 
الحاله : ميكس كل حاجه والعكس 
العنوان : ف العالم اللى كان متوقع انه  يتنهى 
 مش عارفه ابد منين وانتى كل اللى فيكى عجب ، المهم بقى 2012 تعتبر سنه الاحداث والانتخابات والاستفتاءات وحاجات كتير كده وكمان سنه الفرز العظيم.  
2012 هى سنه الفرز ع المستوى العام والمستوى الشخصى ، 2012 فرزت لما قالت يا بس من اول الناس اللى كنت فاكرهم اصحاب وكده لحد كل حاجه وكل شى.
وفرزت الافكار مين اللى تفكيره ضحل ومين اللى عنده شويه عمق حتى لو اختلفت مع رايه  ولكن يظل به عمق. وفرزت مين اللى قواقع اللى عايشين ف اطار واحد مخرجوش منه ومن اللى شاف كل اطارات  المجتمع وعاش فيها . وفرزت مين اللى ينفع يتقال عليهم بشر ومين اللى ميفرقش عن اى اله ف حاجه . فرزت مين اللى عنده مبادئ حتى لو مش متفقه مع المبادئ ديه  ومين اللى بيمشى مع التيار  . فرزت مين اللى اصحاب ومين اللى بتاع مصلحته . فرزت مين اللى تقدر تعتمد عليه ومين اللى اصلا مش مسئول ولا تقدر تعتمد عليه بنكله .
 كفايه كده فرز ولو حد حابب يضيف 2012 فرزت معه فيه يتفضل وانا هاحطها ف البلوج :D 

السبت، 15 ديسمبر، 2012

من يوميات واحده عصرت الليمون

ده مش اكتر من توثيق للحاله معينه عشتها وجاه الوقت اللى اكتبها ليه عصرت ليمون 
مبدئيا كده الاخوان بالنسبه ليا بخ من ساعه محمد محمود من ساعه لما سبونا نموت عشان هم يكملوا العرس الدايموقرطى بتاعهم ومش قادرة الاقيهم اى عذر او تبرير. فبالتالى مرسى وشفيق كانوا واحد بالنسبه ليا واحد اشرف ع موقعه الجمل والتانى جماعته باعتنا ف محمد محمود . اللى باع زى اللى قتل بالنسبه ليا طيب يا اختى مدام كده ليه عصرتى ليمون بقى ،، عصرت ليمون عشان كنت خايفه من المستقبل شفيق كان بالنسبه ليا هو تكريس للحكم العسكر ، شفيق كان ف عهده هيبقى فيه دم ، شفيق ف عهده كان هيبقى فيه محاكمه عسكريه للثوار وللمدنين ، شفيق كان هيعلقنا كلنا ،. بصراحه خفت علينا خفت ع 6 ابريل وكل الحركات خفت كمان ع الاخوان ساعتها خفت ع كل المصريين اللى مش فلول انه يبقى دمهم مستباح مش خفت ع نفسى لانى انا واحده فردنيه مفيش ورايا اولاد ممكن يتشردوا من ورايا .
المهم بقى ديه كانت اسبابى ساعتها ، حبت اسجلها للذكرى وخلينا نشوف هل مرسى هيعمل اللى كان شفيق هيعمله ولا لأ

الأحد، 25 نوفمبر، 2012

دم اسلام ف رقابه مين ؟!!!


انا عارفه ان ف ناس كانت بتحمل ابو اسماعيل ذنب اللى ماتوا ف العباسيه 2 وبالتالى ذنب اللى مات دلوقت ف رقبه اللى دعا للمظاهرات بس سؤال وبجد هل كده #مرسى  ولاخوان ايدهم نظيفه من دمه ؟!!! وهل احنا ساعتها كنا بنحمل ابو اسماعيل بس الذنب ولا كنا بنقول ان المجلس العسكرى - بما انه المسئول عن البلاد ف الفترة ديه- هو المسئول الاول والاخير
هل الحل انى اقول ان السبب حمدين والبرادعى والناس اللى نزلت  ودعت عشان مش عايزين ديكتاتور جديد ؟! هل دم اسلام ر قابة البرادعى وحمدين ولا ف رقابه السلطه ؟!!
سؤال انا لم اجد له اجابه ساعدونى كى اجد اجابه !!
اسلام هيكون شهيد غير عادى لانه شهيد بدايه حرب طائفيه ف مصر بيكرس ليها جماعه فاشيه لا يهمها الا مصلحتها ونخبه لا تعرف بدائل وحلول اخرى  !!

الخميس، 22 نوفمبر، 2012

خربشات توتيريه عن قرارت مرسى الثورية


 خربشات توتيريه عن قرارت مرسى الثورية
اولا التوتيات ديه مش بتاعتى ديه توتيات الاستاذ احمد سعيد  وهى تعليقا ع قرارت مرسى الاخيره ف يوم 22-11-2012، انا اجد فيها الكثير من المنطق  اعتذر مقدما لو فيه الفاظ خارجه حبه
1- اللى بيحصل جوا مصر حاليا جزء لا يتجزأ من اللى بيحصل دوليا , حوار هدنه غزة كان صفقه بين اطراف كتير ,
2- واللى بان لدلوقت هو اول بند , لسه البنود التانيه هتبان قدام ... بس على اى حال اللى جاى فيهم مش هيعجبكم ,
3- كلامى دة موجه للعباقرة اللى فرحانين بدحر العدوان الاسرائيلى الغاشم والكلام المنفوخ الفاضى دة , اعذرنى ياسيدنا الافندى,الموضوع مش كدة خالص
4- اللى جاى فى صالح اسرائيل + (حماس) + اخوان مصر + امريكا , ومش فى صالح لا الشعب الفلسطينى ولا الشعب المصرى ولا القضيه الفلسطينيه
5- مرسى حاول , او بلاش مرسى هكون ادق واقول ( الاخوان ) حاولوا يخبطوا خبطه النايم العام دى من فترة وفشلوا ,
6-وامريكا طلعت قفشت ولمت الدور , لو تفتكروا تصريحات هيلارى الحيزبونه ايامها , يعىن من الاخر امريكا قالتلهم مش دلوقت استنوا شويه
7- وبناء عليه حصلت التمسليه بتاع استقبال عبمجيء محموء فى الرياسه وهما حبوا بعض والفيلم الحمضان دة
8- الاخوان قدموا خدمه جليله لنتنياهو وامريكا بصفقه غزة الاخيرة , علشان كدة امريكا حبت ترد لرجالتها الجميل وادتهم الضوء الاخضر
9- لو مش واخد بالك , افتكر كدة ان هيلارى كانت هنا قريب بتعمل ايه ,
10- وافتكر كل مرة زارت فيها غراب الشوم دى مصر بعد الثورة كان بيحصل بعدها بالكتير بيوم ولا يومين ايه
11- اللى حصل النهاردة هديه امريكا للاخوان , والاخوان مش هبل علشان يكرروا غلطه عزل النايب اللى حصلت قبل كدة بدون استعداد مرة تانيه
12- قرارات النهاردة الاخوان ماليين ايديهم كويييييييييييييس جدا قبل ما ياخدوها وعاملين حساب كل حاجه , ماليين ايديهم من مين ؟ اقولك انا
13- ببساطه ... ماليين ايديهم من امريكا , هيلارى كلينتون هى الحاكم الفعلى لمصر , والاخوان مجرد مندوب عنها او مدير اعمال مش اكتر
14- والاخوان فاهمين اللعبه كويس واتعلموا من مبارك , اى حاجه هتتعمل فى البلد , لازم ياخدوا رأى صاحب المِلك الاول ؟ الشعب؟!! لاطبعا..امريكا
15- وطالما امريكا موافقه , حذروا فذروا مين كمان هيوافق ؟ الجيششششششششش .... اة , بتاعنا دة
16- قياداته البواسل لم , ولا,ولن,يخرجوا ابدا عن طوع الارادة الامريكيه , احنا كوات مشلحه مطيعه , امريكا تقول يمين يبقا يمين , شمال يعىن شمال
17- يعنى من الاخر الجيش هايلزم الحياد طول ما الاخوان مسيطرين عالبلد,لو اتهزوا , الجيش مش هيتدخل لصالح السلطه القضائيه بل لصالح الاخوان
18- الداخليه بقا عامله زى العيل الصغير , الجيش ساحبها فى ايدة , هتروح يمين هيروح معاه , شمال , نفس القصه
19- وطبعا سيادة اللوا الزير ميقدرش كمان يخالف الريس , الريس لو تف عليه يعزله ويشيله , والداخليه مش هتقدر تعمل حاجه
20- يعنى من الاخر , الاخوان حاطين فى جيبهم امريكا , والجيش , والداخليه .
21- الناس اللى هايصه قوى بالبقين الحمضانين بتوع الدسطوريه العليا : سنعزل الرئيس , دى هوهوة كلاب مش اكتر
22- جاوب عالسؤال دة : لو افترضنا جدلا ان الدستوريه قررت عزل مرسى ( بصرف النظر عن قانونيه الاجراء ) ما هى آليه التنفيذ ؟
23- هيكلموة فى التليفون يقولوله ياباشا احنا عزلناك , سايق عليك النبى تمشى ؟ ولا هيدوا تعليمات للداخليه والجيش يجيبوة من القصر بالقوة ؟!!!
24- هتقولى الشعب هو اللى هيقف ورا الدستوريه وهينفذ القرار ..... هقولك كلمه قبيحه .... بلاش احسن ..

25- الدستوريه معندهاش اى آليه تنفيذ , وطالما معندهاش اليه يبقوا مش هياخدوا قرار زى دة اصلا ... استحاله
26- لان قرار زى دة اعلان حرب بين الرئيس وقضاة الدستوريه , ودى مش هتنتهى الا بحد فيهم فى السجن , لانها قاتل يامقتول
27- يعنى مينفعش يتقال جيم اوفر وعفا الله عما سلف وخدوا بعض بالحضن , لأ , والتيوس اللى فى الدستوريه عارفين كدا كويس , وهما اجبن من كدا
28- عبمجىء محموء هيمشى .... والدستوريه هتخبط دماغها فى الحيط .... وقضى الأمر
29- ادخل على نقطه تانيه بقا , ندااااااااااااهه محمد محمود ... السنه اللى فاتت حسى اتنبح ان المعركه كمين وبلا هدف , محدش سمعنى ,
30 - الفيلم بيتكرر بحذافيرة السنه دى برضه , وبرررررضه محدش عايز يتعلم
31- معركه محمد محمود الحاليه كمين تم اعدادة بمعرفه الداخليه لاستدراج اكبر عدد ممكن من الثوار اللى عندهم استعداد ( يقاتلوا ) واعتقالهم ..
32- والحوار دى جاى تحديدا قبل قرارات مرسى علشان الشارع يتفرغ من الكوادر اللى ممكن تتحرك بعدائيه ضد النظام , وميتبقاش غير الهتيفه
33- الداخليه بتخدم على مرسى , بتصفى الشارع من الشباب ( الشرس ) اللى ممكن يعمل قلق جامد للنظام , قبل اعلان قراراته
34- اخش بقا على ( ثورة الغضب ) بتاعه بكرة , وانا حاطط الاسم بين قوسين ..
35- من الاخر , ايا كان اللى هيحصل , حوار بكرة هينزل على مافيش , حتى ولو حصلت اشتباكات ..
36- ابو الفشوخ نازل صمام امان للاخوان , يدعى انه ضد القرارات ويسحب الناس وينيمهم فى العشه لحد ما اليوم يعدى على فاشوش
37- حمديق , عبدة افندى مشتاق , نازل يصطاد فى الميه العكرة ونفسه يبقا ريس , لا هيبقا ريس , ولا هينفع القطيع اللى هيمشوا وراة بكرة , وهتشوفوا
39- اما بقا البراقعى الشهير بارنوب افندى , مش محتاج اعلق على نزوله ..... هو مين اللى فتحله العشه اساسا ؟؟
40- يعنى عايزين تنزلوا بنفس الاليات المتخلفه اللى وكستكم سنه ونص,وكمان نازلين ورا ابو الفشوخ وحمديق والبراقعى , ومستنيين خير ؟!! النبى ايه
41- انا معرفش هيحصل ايه بكرة , ومحدش عارف ايه اللى ممكن يحصل , انما الليله معمول حسابها كويس قوى
42- حصل اشتباكات عنيفه وواسعه ... اشتباكات قليله .... محصلش اى صدام اصلا , كدة كدة اليوم فاشوش واخرة بالكتير اعتصام
44- الخلاصه : الاخوان طبخوها كويس , واحب اقول للناس اللى الادرينالين فاشخ عروقهم دول وعمالين يجعروا ثورة وغضب وافشخانات , النبى تتلهوا
45- روح ياضنايا حط راسك تحت الدش علشان تهدى شويه وتفهم الدنيا حواليك ماشيه ازاى .. وتبرد ( راسك يعنى )
46 - الحوار دة مسمار فى نعش الاخوان , بس مش بان الناس هتنزل بكرة وتشيلهم ... لأ , دا مش هيحصل
47- بقول مسمار فى نعشهم لان مرور الازمه وانتصار الاخوان ( ودة هيحصل ) هيخليهم يتغروا اكتر ويتنفخوا لأقصى مدى
48- دة , هيخلى الشعب المصرى يشوف من الاخوان وش جديد نوووووفى , غير الوش القديم خاااااااااااااااااالص
49- ساعتها الغلابه هيدوقوا الذل والقهر والجوع بحق ربنا .... ساعتها بس هينزلوا يفرقعوا بالونه الاخوان , علشان الجوع .. مش علشان الديكتاتوريه
50 - الحشد الجماهيرى للناس اللى مهتمه بالسياسه والدستور كبير , بس مش بالحجم ولا بالشراسه الكافيه انه يسقط رأس نظام ..
51- الحشد الوحيد القادر على اسقاط نظام كامل ( لو اراد ) هو حشد البسطاء الغلابه , ودول مش هينزلوا علشان سلطه قضائيه ولا تأسيسيه ... انسوا
52- لذلك , احب اختم البقين دول بكلمه للاخوة اللى الادرينالين فاشهخهم فى افكارهم ومعتقدين ان مصر هتنتفض بكرة .... اتغطى قبل ماتنام ياحبيبى
53- بالمناسبه , انا كتبت فى المدونه حدوته طويله شويه متقسمه على بوستين , الاول اخر الصفحه والتانى فوق , ياريت تقروها http://ahmedsaed.blogspot.com/
54- صحيح قبل ما انسى : ابقوا اقروا نص القانون اللى انتوا فرحانين بيه كويس D: https://www.facebook.com/media/set/?set=a.435663766489546.104259.377633175625939&type=1
55- ملحوظه : انا مبقولش للناس اقعدوا فى بيوتكم واستنوا التوقيت المناسب , انا مقصدش كدة طبعا لو دى الفكرة اللى وصلت , الثورات مش بمواعيد
56- عايزين تنزلوا انزلوا وقت ماتحبوا , ونزول الغلابه معاكم من عدمه دى حاجه بتاعه ربنا ... مش مضمونه

الخميس، 11 أكتوبر، 2012

عن الطله الباهية واسباب الجموديه

الطله هنا بمعنى ال look او ال profile  بمعنى اول ما تشوف حد ايه اللى ببوصل لدماغك عنه او انطباعك عن الشخص اللى قدامك .
 انا هنا  هتكلم ع طلتى طبعا ممكن اقعد اتكلم عن طلتى الباهيه اللى مالهاش حل واكتب شعر ف نفسى بس ده مش هيحصل عشان انا مش بحب اتكلم عن نفسى كتير ^_^
انا اتكلم عن ان ف ناس من اصحابى والقرابين منى او ممكن البعيد عنى شايفين انى طلتى بتوحى للناس بالجموديه وانا جامده وماليش زى وبالرغم انى مش اقصد  اعمل كده طبعا بس اكيد كلامهم حقيقى او فيه جزء من الحقيقه فانا قررت انى اكتيب عن اسباب الجموديه اللى بيقولوا عليه ديه :) وهى :
ف البيت دايما شايفين ان مفيش مشكله مالهاش حل وانك كبسمه هتقدر تحل اى حاجه هتقابليها  وانهم دايما هيكونوا داعمين ليك وجنبك  ف اى مشكله
بماانى الاخت الكبيرة  فده بيستوجب عليا انى اكون متحمله المسئوليه بدرجه كبيرة  من وانا صغيرة مش مسئوليتى نفسى بس لكن اخواتى كمان.
طبيعه دراستى وشغلى -الهندسه -وكمان العصر اللى احنا فيه بيخليك تجمد نفسك عشان الضغوط مش تكسرك.
واخيرا بقى ف البيت شايفين وعلمونى  انى انسان ومش مجرد بنت قليله الحيله  ومش بتعرف تروح ولا تجى لا انتى  انسان كامل الاهليه  بيفكر وبيعرف يحل مشاكله.

وف الاخر عايزة اقول انى ممكن اصلا مكونش ولا جامده ولا حاجه وديه مجرد تهيوات  :D


الاثنين، 13 أغسطس، 2012

اكتب دستورك

اللجنه التاسيسيه للدستور عامله ع المواقع بتاعها  اماكانيه ادخال طلبات المواطنين ف الدستور عن طريق اللينك ده
http://dostour.eg/constitution/commitee

انا شايفه ان كلنا لازم ندخل ونكتب اللى احنا عايزينه ف الدستور وده ممكن يحصل كافراد او لو فيه موسسات حقوقيه الدستور او مبادرات المجتمع المدنى اللى شغاله ف الدستور
كانت مداخلتى ع الموقع هى كالاتى :


"يجب ان يشعر كل مواطن مصرى ان حقوقه محفوظه كى ينتنج ويعطى بلده بكل طاقه لان الدستور يجب ان يحفظ حقوق المواطنين كحفظه للواحبات وانا كمصريه نوبيه فان مقترحاتى للدستور المصرى هى كالاتى
1- ارساء مبدا عدم التميز ع اساس الع
رق بالاضافه الى اللون والجنس والدين
2-الاعتراف باللغه النوبيه ورعايتها وتدريسها ف المدراس بجانب العربيه
3-الاعتراف بالثقافه والتاريخ النوبى كجزء اصيل من التاريخ والثقافه المصريه
4- لقد كان للنوبين معاناه مع الهجرة لعده مرات ربما ان حق العوده والرجوع الى ما حول البحيرة ينظمه القوانين اكثر من الدستور، ولكن ارى ان الدستور يحب يحفظ حقوق ممن يتعرض للتهجير لمصلحه الوطن ،وكما ان الدستور يجب ان ينص على شروط التهجير "

وقد اهتمت مبادرةالدستور يا نوبيين  بالتوعيه باهميه الدستور عموما  للمصر وخصوصا للمجتمع النوبى والنوبين 
والتى صفحتها ع الفيس بوك هى https://www.facebook.com/nubian.Constitution
وسانقل لكم بعض مدخلات النوبيين التى نشرتها الصفحه 
1- 
حمد علم الدين
شــاب نـــوبى 
ودى افكــاره اللى وصلها 
لتأسيسية الدستــور
-------------
بسم الله الرحمن الرحيم
مصر خلقها الله كحديقة ازهار مختلفة الالوان والاشكال وميزتها انها مختلفة في شكلها ولونها
عار ان يتجاوز دستور الوطن تلك الحقيقة عار ان يتجاوز تلك الحديقة ربانية الصنع
كل ما نريده نحن النوبيين من دستورنا إذا كان بالفعل دستورنا ان يعترف ويشير إلى التنوع الذي اقره الله واختاره ...
لقد خلقنا الله بلسان نوبي وليس عربي مع الاحترام الكامل للغة العربية لغة القران ولكن القران الكريم نفسه يشير إلى التنوع في الالسن والالوان والشكل ( ومن اياته خلق السموات والارض واختلاف السنتكم والوانكم إن في ذلك لايات للعالمين) سورة الروم 22
وكما ان مصر بها تنوع ديني ايضا بها تنوع عرقي وثقافي هذه حقيقة يجب ان نسلم بها فمصر ليست عربية فقط مصر افريقية إسلامية قبطية ونوبية لماذا اختزلنا مصر في العروبة لماذا عندما نتحدث عن النوبة وبلغتنا نتهم بالعنصرية فإذا كان كذلك فايضا حبنا لمصر هي عنصرية ضد العرب والعروبة وحبنا للعرب والعروبة هي عنصرية ضد افريقيا والافريقي مصر ليست شكل واحد ولغة واحدة مصر بها قوم يتحدثون بلغة نوبية فيجب ان يحترم الدستور تلك الحقيقة ويشير ويعترف بها في الدستور .

ام هل نريد ان تكون الحديقة لون واحد وشكل واحد عقيم لايحمل التنوع في الشكل او اللون
ما نريده:
1.ان يضاف إلى قانون عدم التمييز اللون والعرق
2. الاقرار بالتعددية الثقافية والعرقية والحفاظ عليها من خلال عمل اليات لذلك
3. الاعتراف بوجود لغات محلية( نوبية البجا الامازيغ) بجانب اللغة العربية

2- على لجنــة صـــاغة الدستور

 أمــال وأحــلام 
محمد حمــدى حداد 
فى دستـــور مــصر
=============
بسم الله الرحمن الرحيم
انا هاقول ايه اللي انا نفسي اشوفه في دستور بلدي مصر
انا مواطن مصري نوبي اسود زيي زي ملايين موجودين علي ارض البلد دي من ساعه ما ربنا خلقها جدودي فاعلين فاعلين في حاضرتها ومشاركين في بناءها من الاف السنين حاربوا وماتوا عشانها من ايام احمس ضد الهكسوس لحد العسكري الشهيد الاسمر اللي مات في رفح ...
مش كده وبس نفسي دسنور بلدي يخليها زي كل الدول المتقدمه والمتحضره دلوقتي .. دول خللت كل اهلها مهما كانت اختلافتهم يشاركوا في وضع دساتيرها .. دساتير تحترم المكان والانسان مهما كان تميزه او اختلافه ..
دستور يحترم المكان اللي انا بنتمي له واللي بلدي موجوده فيه .. احنا مصريين زي ما احنا موجودين وسط العالم العربي العظيم برضه احنا جذورونا مأصله في قاره افريقيا التي لا تقل عظمه و وقرابه مع اهلها ...
نفسي في دستور مابيفرقش بين اي مصري ومصري كلنا واحد كلنا مصريين عرب نوبيين صعايده فلاحين امازيج حلب بشاريه عبابده بدو مسلمين مسيحين وحتي اللي مالهمش دين كلنا واحد لينا نفس الحقوق وعلينا نفس الواجبات ... مفيش تمييز في اللون او الدين او العرق او اللغه ..
اللغه اللي لازم يشار انها مش عربيه بس لا مصر اكبر مصر فيها لغات من الاف السنين غير العربيه لازم تتحط في الدستور احتراما لها وفخارآ بيها وفوق كل ده اعتراف اصلي بمصريه وانتماء اهلها ...
من الاخر نفسي الدستور يكون فيه البنود دي
1- مصر دوله تنتمي لقاره افريقيا والعالم العربي
2- مصر دول لغتها العربيه مع لغات اخري محليه معترف بها وبدراستها والتدوين بها
3- يعاقب بالقانون كل من يمارس اي فعل ينم عن الكراهيه او التمييز الديني او العرقي او الطبقي
دي كانت رؤيتي او حلمي للي نفسي اشوفه في دستور بلدي مصر
اعظم واكبر واعرق بلد في الدنيا

 وستجدوا ع الصقحه باقى المشاركات التى تمت من النوبين ع الموقع .
انا بادعو كل الناس انها تبدا توصل صوتها للحنه التاسيسيه عن طريق الموقع حتى لو كنت من الغير راضيين عن تشكيل اللجنه بالشكل الحالى 


السبت، 4 أغسطس، 2012

عن اللجنه المبعوثه من تاسيسيه الدستور لسمع طلبات النوبيين



عن اللجنه المبعوثه من تاسيسيه لسمع طلبات النوبيين
انا رحت متاخر شويه كان حد من اللجنه بيعرض برزيشتن ع السريع عن التاسيسيه ولجان التاسيسيه وعن موقع اللجنه والذى هو كالاتى http://dostour.eg/
بعدها بدا محمد البلتاجى رئيس اللجنه بالحديث عشان يقول قواعد الجلسه ايه وكانت كالاتى
1- كل واحد هيتكلم ف مدخله لا تزيد عن 3 دقايق
2- اللجنه لن تعلق ع اى راى وياريت اى حد يقف لا يعلق ويقول موضوعه ع طوال
3- كل الافكار مرحب بها
بدات اللجنه المنظمه تاخد اسماء الناس اللى عايز تتكلم
الناس بدات تتكلم
الواضح ان الناس معندهش مفهوم كامل عن الدستور ف ناس كتير اتكلمت ع حق العوده 
المتخصصين ممكن يشوفوا ان ده مش ممكن يكون ف الدستور بس انا بقى ليا راى ف الموضوع ده
حق العوده ده كان نتيجه التهجير القسرى اللى تم للنوبين ع اكتر من مرة من اول بناء خزان اسوان الى بناء السد العالى
بالتالى المفروض الدول تحفظ ف دستورها حقوق  اى حد يتعرض للتهجير عشان مصلحه البلد ،وكمان المفروض الدستور يقول ايه شروط التهجير مش اى سلطه تنفيذية تجى بعد كده عايزة تهجر الناس قوم تعمل عمليه التهجير
 ف ناس بدات تتكلم عن الحفاظ ع الهويه النوبيه والتاريخ والثقافه النوبيه
و ف ناس طالبت بتدريس اللغه النوبيه ف المدراس كلغه محليه
تسال الكثير لماذا لا يتم تدريس التاريخ النوبى بالمدراس بالرغم انه جزء من تاريخ مصر وبيتم تجاهله بصورة متعمده
ف ناس اتكلمت عن المفروض ف الماده بتاعه عدم التميز يضاف اليه ايضا عدم التميز ع اساس العرق
 حيث تسربت اخبار ان التاسيسيه رفضها انه يضاف ع اساس العرق لاسباب لا يعلمها الا الله
اما انا فكانت مدخلتى حول نقطتين
1- البحث العلمى والدستور
2- موضوع ان مصر دوله اسلاميه وعربيه وتربط باقريقيا  وقولت بالنص
"ان مصر افريقيه قبل ما تكون اسلاميه او عربيه   ولو دستور مصر هيتجاهل افريقيا ف مش نلوم غير نفسنا لو افريقيا قررت انها تاخد اى اجراء"
اما اكثر المشاركات وضوحا بالرغم محاوله البلتاجى مقاطعته وذلك بحجه ضيق الوقت كانت مشاركه ممثل مبادرة
 "الدستوريا نوبين " احمد رجب
وكانت كالاتى :
اليس من المفنرض بعد ثورة 25 يناير ان يكون دستور مصر معبرا عن صورة المجتمع المصر الذى
يذخر بالعديد من الثقافات والاعراق واللغات والمجتمعات ذات الخصوصية والتى شاركت جميعها فى الثـورة ,
الأ يجب ان يعبر هذا الدستور عن كل هـذا علما بان دستور جنوب افريقيا بعد انتهاء نـظام الفصل العنصرى أقر بتعددية الثقافات والاعراق واللغات ولم يثتثنى حتى "الافريكـانوز" سـاكنى جنوب افريقيا البيض ,وعمل على دمجهم داخل جنوب افريقـيـا وعدم الانتقاص من حقوقهم برغم الفظائع التى ارتكبوها فى حق شعب جنوب افريقيا"السود" بل وتم أقـرار لغتهم كلغة رسمية محليـية؟
وكـان سـؤاله الثـانـى بخصوص المسـاؤاة فى الدستور وتجريم التمييز
هـو:كيف يقر قانون تكوين الاحزاب الذى صدر بعد الثورة على منع قيام الاحزاب على خلفية دينية او عرقية ,
 ولا ينص الدستور على منع التمييز على اساس اللون و العرق بالاضافة لشتى انواع التمييز (دين-لغة-وضع اجتماعى-وضع صحى-اصل-جنس)
اما سؤال عضو الحملة الثالث  فكــان خـاص بالحفاظ على اللغة والارث النوبى وهذا نصه:
المغرب والجزائر وحتى العراق قبلهم فى دستور سنة 23 , الذى شارك فى وضعه "السنهورى باشا"
 تقر دساتيرها باللغات المحلية داخل هذه البلاد كلغات رسمية يحق لمتكلميها تعليمها ودراستها فى المدارس الحكومية بجانب العربية ,
وفى جنوب افريقيا حتى العربية والعبرية يقر الدستور باحقية متحدثيها من تعلمها بالمدارس ,
فكيف لمصر بعد الثورة اجحاف حقوق متحدثى اللغات المحلية داخل مصر ( النوبية - الامازيغية- البــجـا) من التحدث وتعلمها داخل المدارس الحكومية حتى على نطاق اقليمى علما بأن هذه اللغات والثقافات تشكل ركيزة اساسية للأرث التراث الحضـارى والثقافى المصــرى .
وبعدا بدا الناشط النوبى احمد كاجوج ف الحديث واسرد تاريخ النوبه وتاريخ علاقه الحكومات المصريه مع النوبين التى كانت هذة علاقه احجاف وقال ايضا ف كلمته انه ان لم يتم معالجه مشاكل النوبه وحفظ حقوق ابناءها ف الدستور وعدم التميز ضدهم فانهم
سليجا وا الى تدويل القضيه .
انا بعد هذة المدخله اضرت انى اروح عشان تاخر الوقت ، فهذا هو ما حدث اثناء وجودى
اللقاء لم يخلو من بعض المشادات الكلاميه والانفعالات التى تم احتواءها
اتمنى ان دستور مصر الثورة يكون معبر عن كل مصر باختلاف ثقافتهم وعرقهم ، وانه يحفظ الحقوق قبل الواجبات  :)







الأحد، 29 يوليو، 2012

The Day of a love



الحب من غير امل هو اسمى معانى الحاجات بالجمله ديه اللى مش عارفه مين قالها هابد اكتب عن الحب من طرف واحد . عامه انا اللى يشوفنى يفتكر انى مش رومانسيه ويفتكر ان حد عملى جدا ولكن مش ديه الحقيقه اووى بصراحه ممكن اكون بفكر ف اى حاجه بالمنطق وممكن اكون بافند الاسباب والحلول لاى حاجه وممكن تكون كلمى الشهير define ! :D بس مش معنى كده انى مش ممكن اقع ف الحب

واهو وقعت ع جدور رقابتى انا مش فاكرة امتى بالظبط بدا الشعور بتاعى ده يمكن لما حسيت اننا شبه بعضنا  وبنحب نفس الحاجات وفيه اراضيه مشتركه يمكن يوم ما بدات اكلمه عن احلامى وطموحى وعن اللى بعمله ف حياتى وعن تجاربى ف الحياه هو صحيح مكنش بيعلق ولا بيقول رايه بس انا كنت مستمتعه وانا بتكلم معه ف الاول كنت فاكراها زى اى صديق بتكلم معه عن حياتى بس مع الوقت حسيت انه لا مش كده هو كان مميز وكنت حاسه انى انا كمان مميزة بالنسبه له مقدرش اقولك ايه اسباب احساسى انى كنت مميزة بس انا حاسيت كده وخلاص كنت بتستغل اى فرصه عشان اقرب واشوف اى فرصه عشان هو كمان يقرب ، بس مجاش ف بالى انى المح باى حاجه يمكن عشان كنت مقتنع انه من القلب للقلب رسول والرسول ده المفروض يكون اوتوماتيك من غير لا تلميح ولا اى حاجه . بدات احكى عنه لاصحابى وبدات اوصف لهم عن شعورى واحساسى -البنات بطبعهم بيحبوا يتكلموا عن مشاعرهم- وبدات يبقى عندى فضول عن اخباره وعن الحاجات اللى بيحبها والحاجات اللى مش بيحبها . بس بعد وقت اكتشفت انه مكنش ما بين القلب للقلب رسول ولا حاجه وتقربيا مكنش واخد باله من حاجه او واخد باله وبيستهبل بصراحه مقدرتش احدد وبدا يكون من ناحيته فتور ويظهر انه حد تقربيا مش مهتم . لحد ما حصل حوار بسيط وعادى بس رايه تقريبا صدمنى وحاسيت اننا لا شبه بعض ولا حاجه ولا ان بينا اى ارضيه مشتركه ويومها كتبت الاستيس ديهلماذا لم ادرك اننا مختلفين تماما , لماذا كنت ابحث عن التوافق -الغير موجود - لماذا الاصرار ع انه يشبهنى .............. لماذا !!"

الموضوع تقريبا بدا يتنهى من ساعتها لما حسيت فعلا اننا مش شبه بعض ولا فيه رسول ما بينا ولا حاجه , بس من يومين عرفت انه قرب يرتبط وبدون اى مبلغه لما عرفت مش حاسيت باى حاجه فعلا مش حاسيت . يمكن بعدها بيومين بدات احس ان فعلا خلاص الموضوع انتهى . انا بصراحه مش زعلانه مش زعلانه انى عشت الاحاسيس ديه ومش زعلانه انها مش لاقيت قصدها مشاعر ومش زعلانه ع اى وقت قضيته .وحاسه انه يوم من ايام الحلوة اللى ف حياتى  :)، بالرغم ان النهايه مش سعيده 

الأربعاء، 18 أبريل، 2012

ذكريات مع جدى


­­­­­­­­­­هذة التدوينه كتبتها  اختى ايات عثمان ولانها لا تمتلك مدونه فانا استضفتها ف مدونتى          
           



فى البدايه احب اذكر ان دى تجربتى الاولى فى الكتابة ؛اسم الموضوع بيمثلنى لانى كنت فى الوقت دة عندى تقريبا 10 سنين


رسمت الصورة دى وانا فرحانه اوى لان جدو كان فرحان بيها يمكن عشان كانت بتمثل حاجات جواة ورغم انها غير كامله الا انه كان عايز يدخلها مسابقة مواهب فى جمعية المهناب بالاسكندرية.
 احب اقول انى رسمت الصورة من حكاوى جدو الله يرحمه كان ديما بيحكى عن النوبة زمان من قبل ما يتهجروا  والبلد القديمة وشكلها ونخلها وازاى هو نفسوه يرجع تانى لبلاد جمال ربانى
وكان بيقارن بين البلد القديمة والجديدة وانه ازاى فى اختلاف جامد(النيل ..والصحرا ....وسع البيوت والضيق والعفرة ....... وحاجات كتير).وكان بيقول ان هما متخلوش عن ارضيهم بسهوله بس علشان مصر وانالخكومه وعدوتهم بالعودة وفى ناس كتير مستحملتش البلد الجديدة فابتدوا يروحوا اسكندرية والقاهرة وان عائلتهم كانت من الناس دى لان الحياة كانت لاتطاق على حسب كلام جدى .انا اتأثرات بيه جدا وبكلامه وحكاويه حتى بتعبيراته الى مش قدرة انساها لحد دلوقت علشان كدة تشوف انى قسمت الصورة نصين نص للبلد
الجديدة الى موجودى بعد كوم امبوا بالتراب والجبال والبعد عن النيل والبيوت الضيقة والنص التانى لبلدنا اللى
موجودة ورا السد وعلى حسب كلام جدى ساعتها  ان فى ناس مش نوبين  بتفكر وابتديت تروح هناك وان حلم العودة بيتسرب بوجود ناس تانية.
 فى النهاية حبيت اقول كمان لاى حد بيقولنا احنا الشباب انت تعرف اية عن التهجير ولية بتتكلم بحماس اوى كدة وانك مش هتعرف تعيش هناك .ببساطه  احنا اتربنا على دة من جدودنا وامهاتنا و حتى لو محضرناش دة بس احنا حلمنا بالعوده مش مهم انك تكون حاضر حاجة علشان تتأثر بيها طبعا دة ميمنعش ان الى حضر مأساته اكبر 

سنعود يوما


انا ولدت ف مدينه الاسكندريه وعيشت حياتى كلها ف مدينه اسوان
وولدت بعد التهجير بفترة ليست بقليله وربما لا اعلم تفاصيل هذا اليوم الاليم ف حياه النوبيين ولكنى اشعر به ربما هذا الشعور انى اعرف هذا اليوم لانى جدى –الحاج محجوب ميرغنى  احدى معلمى اللغه النوبيه ف الاسكندريه – كان يحكى لنا ونحن صغار عن هذا اليوم لم نكن ندرك تمام حجم الالم ولكنى اتذكره جيدا حينما كانت تتغير نبره صوته وهو يتكلم عن بلاد النوبه القديمه بلاد الدهب الساحره واتذكر مراره صوته وهو يتحدث عن معاناه الهجرة والمكان الذى ذهبوا اليه بعد التهجير انه كم كان يصف الجحيم بعينه وبالرغم كل شئ حدث وكان يحدث الا انه كان دائما متفائل باننا سنعود ف يوم من الايام الى هذة الساحره النوبيه وهذا الاحساس لم يكن لدى جدى فقط ولكنك ستجده ف كل نوبى سمع عن النوبه وعرف عنها وانى اشعر بهذا واخواتى وابى وكل عائلتى تشعر باحساس خفى اننا سنعود الى ارض الاجداد الجميله الساحره

الثلاثاء، 17 أبريل، 2012

أنا لست بكارآ


بالطبع هنا اقصد الشخصيه الكرتونيه التى أخرجتها المخرجة منى ابو النصر وليس الاستاذ نادر بكار المتحدث الرسمى للحزب النور
للاسف ان الشخصيه النوبيه لدى الكتير من المصريين ف الشمال هى الشخصيه الكرتونيه بكار ولكن يا سيدى انا مضطرة اصدمك واقولك انى مش بكار لان انى لاتحدث مثل بكار الذى لا يتحدث النوبية ولكن بطريقه لا يتكلم به النوبيين لان النوبين ياما بيتكلموا النوبية او العربية
كما ان بكار يعيش وسط اثاره النوبيه ولكن هذا ليس الحال للنوبيين الذين لا يعيشون بالقرب من اثارهم الا القليل منهم ف مدنيه ابو سمبل السياحيه والباقى منهم لا يتمتع بهذا
بالاضافه الى ان بكار علاقته بالشرطة المصرية تكاد نكون طيبه للغاية فهو ف المسلسل الكرتونى مغامراته مع الشرير مشرط يجد الشرطه المصرية تساعده بكل قوة وهو ماليس صحيح بالنسبة للنوبيين –انى اعلم أن الشرطه المصريه هى من أسوء أجهزة الشرطة ف العالم وتعامل المصريين بسوء- ولكن الشرطه تتعامل بعنف اكثر مع النوبيين يكفى أن اذكر لك حادثه تاجر الفراخ  عبد الوهاب عبد الفتاح الشهير ب كره الذي تم قتله من احد رجال الشرطه  داخل منزله  وامام زوجته بدون اى أسباب واضحة او معلومة وللعلم هذا الظابط لم تتم محاكمته ع فعلته وحتى بعده الثورة وبعد كسر شوكه هذا الجهاز فإذا بأحد أمناء الشرطة يطلق الرصاص ع مركبي نوبى  اثناء شجار وكان مصير هذا المركبى الموت ومصير أمين الشرطة هو عدم المحاسبة
انى هنا لا اقوم بنقد المسلسل الكرتونى ولكنى  اسرد بعض الحقائق من واقع النوبين البعيد عن المسلسلات.
 كما أطالب بعدم وضعنا ف شخصيه نمطيه مهما كانت هذه الشخصية اذا كانت بكار او غيره، فان النوبيين ما هم إلا مصريين لهم هوية وثقافة مختلفة وخاصة يريدون ان يعيشوا ف وطن يحترم هذا الاختلاف ولا يضعهم ف قوالب جامدة لا تمثلهم تماما 

الأحد، 25 مارس، 2012

دستور يا اسيادنا

طبعا واضح من العنوان انه عن الدستور بس انا مش هتكلم عنه عشان انا لا ناشطه سياسيه ولا خبيرة حقوقيه عشان اتكلم ف الموضوع ده انا هتكلم ف موضوع اختيار اللجنه التأسيسيه بس بمنظور تانى طبعا مش هتكلم عن انها لجنه غريبه ومعظمها اخوان والكلام ده اومال هتتكلمى ف ايه خلصينا  انا هتكلم ان اختياريها بالشكل ده وغياب اى ممثل عن عرق مهم ف مصر وهم النوبيين انهم بدوا ف قطع الخيط اللى كان بيربيطنى بمصر الكلام ده بجد انا مش هتكلم عن فكرة الانفصال والكلام ده ولكن انا كبسمه فعلا  حاسيت بانفصال عن هذة البلد لان للاسف بعض المصريين بيعتبره نفسهم احسن منناوكمان  بيفكروا هو اية اللى ناقصكم يعنى 

الاثنين، 5 مارس، 2012

بسم الله الرحمن الرحيم

بسم الله الرحمن الرحيم
دية اول مدونه ان شاء الله مش هحاول اتفزلك واقول اصل انا بحب الكتابه من زمان وكان نفسى اطلع كاتبه والكلام الكبير ده
انا ببساطه قولت اجرب الموضوع واشوفه لو حلو هكمل مش حلو هاسيبةطيب ليه مش اكتب نوتس ع الفيس بوك وخلاص عشان حاسه انى هاكتب هنا براحتى بعيد عن انى افكر هل حد من اصحابى هيتضيق ولا لأ وكمان  اللى كبر الموضوع ف دماغى انى لسه بابدا اعمل فيها لاقيت  صديق محمد سامى او "سامى"  بيقترح اننا نعمل بلوج لل ITI اكيد هعمل تدونيه خاص به
ياريت اعرف اكتب مواضيع كويس