بداية ونهاية قصصهن ( 3)

قصصهن (3)

ديه سلسلة قصص ناويت اكتبها مستوحاه من خيالى اولا ومن واقعى ثانيا تجربه كتابه عايزة اشوف هتودينا ع فين ، فضفضه من نوع اخرى يحمل شكل القصص ولكن بطريقه مش احترافيه وبطريقه عفوية جدا لان اللى بتكتب لسه مش قررت انها تشوف الاحترافى ازاى ومعنا تالت قصة :

 بدايه ونهاية 

صحيت من نومها على حلم غريب عجيب بس حلو ف نفس الوقت . بطلتنا  بنت انطوائيه وعاده مش بتحلم كتير او لما بتحلم بتكون مجهزة هى عايزة تحلم بايه بتكون مرتبه ف دماغها ان النهرده عايزة احلم بكذا وكذا   وتسيب نفسها للحلم بعدها
 بس المره ديه مكنتش مجهزة بالعكس هى كانت مقرره من فتره انها متجبيش سيرته اصلا الا هو عزيزيها البعيد . حلمت انها معه برغم انها واثقه انه اصلا مش نصيبها من اول يوم شافته فيه.  وبعد صحيانها واستغرابها للحلم لاقيت نفسها بتفتكر اول يوم شوفته فيه  ده تقريبا عدى عليه سنه او اكتر بس المفأجاة انها  فاكرة اليوم بكل تفاصيله!!  فاكره كانت لابسه ايه فاكرة هو كان لابس ايه  فاكرة المكان اللى اتفقوا يتقابلوا فيه فاكرة الشارع الطويل اللى مشيوا فيه يومها ، فاكرة التفاصيل كلها وفاكرة الكلام اللى اتكلموه كله لاقيت نفسها بتردد الكلام اللى قاله عن رايه فى شغلها ولاقيت نفسها بتقول ردودها اللى قالتها ساعتها . وافتكرت ازاى ضحكت على كلامه عن موضوع معين . فاكرة لمعان عينه وهى بتتكلم عن موضوع كان شده وفاكرة ازاى كان عجبها ارائه فى معظم اللى اتكلموا فيه فاكره دهشتها ان فيه ناس لسه جميله كده . فاكرة كانوا طلبوا ايه وفاكرة ساعه لما سكتوا فجأه وبرغم السكوت والصمت الا انه كان حاصل تواصل تواصل يسرى فى الجسد كله تواصل لاول مرة تعرفه .. ايه ده هو الصمت بيعمل تواصل ؟!! كانت تتسأل بداخل نفسها بصمت . 
 انتهى!